Adat Melamat Dan Nikah

MELAMAR

ASSALAMUALAIKUM WR WB

I.                      NINEK MAMAK TUO TANGGANAI, PADA MALAM NAN BAIK, KATIKO NAN ILUK KO, BASAMO AYAM BA INDUK, SERAI NAN BARUMPUN, BUKIT NAN TINGGI LAH KAMI DAKI, LURAH DALAM LAH KAMI TURUN, GUNO UNTUK DATANG KERUMAH ................... SEKELUARGO NINEK MAMAK SUKU NAN SEBELAH, ATAS KE DATANGAN KAMI KO  JANGAN TAKEJUT BAK DI TIMPO KASAU, TAGAMAN BAK DI TIMPO UPIH.

            KEDATANGAN KO HANYO BASANGU PALIMAN NAN SABUAH YANG BARISI SIRIH NAN SACABIK PINANG NAN BATEMIS.

                                        URANG DUSUN BATANAM MANGGIS

                                        TUMBUH SEBATANG SIDALAM PADI

                                        SIRIH BASUSUN PINANAN NAN BATEMIS

                                        IKO YANG ADO DARI KAMI

            PALIMAN NAN SABUAH MINTA DIBUKA SIRIH MINTA DIMAKAN, RUKUK SEBATANG MINTA DIISAP, ITU DULU YANG ADO DARI KAMI.

II.        BAIKLAH, ALUA MAMAK ALUA PARADIK, ALUA SANAK TUO, ALUA PANAKAN DAN SAGALO KITO YANG HADIR, KOK KECIK IDAK DISEBUT NAMO, KOK GEDANG  IDAK PULO DISEBUT GELANYO. SEBELUMNYO KAMI MINTA MA’AF, KAMI SUSUN JARI NAN SAPULUH, KAMI TUKAU KEPALO NAN SATU, KAMI HUJAM LUTUT NAN DUO. SEMBAH KAMI TUJUKAN KEPADO DAN TUO-TUO, SERTO NINEK MAMAK SALAM KAMI TUJUKAN KEPADO SEGALO KITO NAN BANYAK, KARNO KAMI BAJALN NAK DULU SALANGKAH BAKATO JUGO NAK DULU SAPATAH.

            SESUAI BAK KATO SALOKOHNYO

                                        DARI JAUH KAPAL MALINTANG

                                        PATAH TIANG MENIMPO KAMUDI

                                        DARI JAUH KAMI KO DATANG

                                        GEDAN MAKSUD DATANG KEMARI.

            GEDANGLAH WUJUD DENGAN NIAT, TINGGILAH ACAM DENGAN CEMAN, NAMUN DITURUT PADO DARI NYO KAMI KO. IBARATNYO IDAK MENEPIK MATO PARANG, IDAK TATETANG MATO ARI, TAPI MAK MANO LAH NAK NGATONYO. PEDIH-PEDIH HATI TATEKAN, MALU-MALU MUKO DI USAP, NAMUN MASUD HATI KO NAK KAMI SAMPAIKAN JUGO.

            YANG MANO MAKSUD KAMI KO IOLAH MENGENAI, ANAK KEPONAKAN KAMI YANG BANAMO SI ...........ANAK DARI PADO SI .............DAN ............., NAMPAK NYO KINI KO KOK KECIK KO NYO LA GEDANG, KOK RENDAHNYO LAH TINGGI, RENDAHNYO LAH MANUKEK LANGIT, GEDANGNYO LAH MEMENUHI ALAM, LAH PATUTUNYO KO NAK BARUMAH TANGGO BATAPIAN TEMPATNYO MANDI.

            LAUT NAN SLAMO KO, LAH DIRAYAU PADANG NAN UJO, LAH DIRESO TALI NAN PANJANG, MENURUT JEJAK YANG TATUKIK RUNUT YANG TABENTANG, PIJAK NAN TATUKIK, KEBAWAH TAPAK, TUNUT NAN TABENTANG DI BAWAH TANGGO. PADANG MATO DAK DAPAT DIKISA. KENAK HATI DAK DAPAT DI ALIH. BAK KATO PNTUN SLOKONYO

                                        REMUJU DIDALAM PADI

                                        GILANG DI ATEH BETO

                                        LAH SETUJU DALAM HATI

                                        LAH SAKILAN DARI MATO

            IOLAH DENGAN ANAK BUAH ANAK PENAKAN MAMAK DI RUMAH KO YANG BANAMO SI ........., MAKLUM LAH, SAMO-SAMO DI KASAP PENGEBAT ATAP, SAMO-SAMO DI JARAUT PENGEBAT LANTAI, MAKSUD HATI NYO KO LAH DISAMPAIKAN KEPADO ADAD PADANG KEPANASAN, ADAD BUMUN PENYELARO.

            JADI ITULAH KEDATANGAN KAMI PADA MALAM KO, BAK KATO ADADNYO NGEPUK BUMUN MERAJAH GABING KO DUDUK KAMI NAK NUMPANG BATUIK, KOK TEGAK KAMI NAK NUMPANG BATANYO. MANOLAH TANYO KAMI TU KOK BATANG GEDANG TU LAH BACAP, KOK PUCUK TINGGI TU LAH ADO YANG GETUNGNYO, SEBAB NGAPO KAMI TANYO, MAKLUM KAMI TAKUT TADORONG SALAH SIPANG, SESAT SALAH JALAN

            TAKUT KELAK MELINTAS PENGUHULU, MEMELAT BATIN DI BALAI, KOK LAH ADO UMPAMO NYO KAMI DAK PULAK BAKECIK ATI, SESAT DIUJUNG TALI BALIK KE PAKAL TALI, TAPI KALU BELUM ADO, ACAM KAMI TU NAK MALETAK ANAK BUAH PENAKAN KAMI DISIKO YANG BANAMO ........

 

            ITULAH  DULU HAJAT KAMI PADO MALAM KO

            SESUAI SLOKONYO

                                        ANAK BOYO MUDI NGALUMBANG

                                        MUDIK DITENGAH BATANG HARI

                                        CUBOCUBO MAIN GELOMBANG

                                        KALU BIDUK NAN SAMPAI KE TEPI

III.      ALHAM DULILAH TERIMO KASIH ATAS JAWABAN NINEK MAMAK SUKU NAN SEBELAH NAMPAK NYO DAK DO LAH DAHAN YANG MENIMPO KUDUK KOK RANTING BAKAL MEMETIK MATO. BAIKLAH KEDATANGAN KAMI PADO MALAM IKO, IOLAH MELAMAR ANAK BUAH PANAKAN KAMU YANG BANAMO SI ........DI RUMAH KO. KARNO LA ABIS ARI BAGANTI ARI, ABIS BULAN BAGANTI BULAN. KOK SAUT NAK DILANGSUNG SANGI NAK DISAMPAI, ITULAH DULU NINEK MAMAK NAN SEBALAH.

            BAIKLAH NINEK MAMAK SUKU NAN SEBELAH LAH BENAH KATO NINEK MAMAK TU. KAWIN BA RADAD SARAK BAHUKUM, JADILAH YANG MANO. KAMI KO TADI SELANGKAH MENINGGAL LAMAN, SETANGKAH MENINGGALKAN TANGGO, MEMENAG ADO YANG KAMI BAO.

            KOK TETAK IKO LAH BUKUNYO, KOK LACA IKO LAH RUAS, KOK BAPUCUK BUAT PANGANTUNGNYO. KOK KABAWAH BUATLAH PALETAKNYO.

            KAMI RASO HANYO ITU LAH YANG DAPAT KAMI SAMPAIKAN LEBIH DAN KURANGNYO KAMI MOHON MA’AF, KAMI SUDAHI ASSALAMU’ALAIKUM. WR.WB.

JAWABAN MELAMAR

ASSALAMUALAIKUM WR WB

I.                      BAIKLAH NINEK MAMAK, SUKU NAN SEBELAH ATAS KEDATANGANNYO, KAMI UCAPKAN TRIMO KASIH. BAGI KAMI IDAK PULO TAKEJUT BAK DITIMPO KASAU, TAGAMANG BAK DITIMPO UPIH. ATAS KEDATANGAN NINEK MAMAK NAN SEBELAH.

            LAUT NAN SELAMOKO, LAH PUTIH MATO DEK MENENTANG, LAH RUNTUH TEBING DEK MENINJAU. DEK NUNGGU DUNSANAK JAUHAN BAKAL DATANG, PEMEMAN DEKAT NAN BAKAL TIBO, JADI NAMPAK-NAMPAKNYO YANG KITO TUNGGU LAH DATANG YANG DI TATIK JUGO LAH TIBO. SAULAK PULO DARI PADO ITU SESUAI BAK KATO PATUN SLOKO

                               ANAK BAYAM DI DALAM SEMAK

                               ANAK TUPAI PANDAI MELOMPAT

                               SALAM KAMI TUJUKAN KEPADO YANG BANYAK

                               SEMBAH KAMI HAMPA PADO YANG DEKAT.

            BAIKLAH NINEK MAMAK SUKU NAN SEBELAH DAN SEGALO KITO YANG HADIR, YANG MANO PADO MALAM KO KITO LAH DIDATANG TAMU YANG BERASAL DARI .........., YANG MANO TAMU KITO KO LAH MENYERAH PALIMAN JADI YANG MANO SESUAI PULAK BAK PATUN SLOKOHNYO

                                        GAMUTUP BUNYINYO GENDANG

                                        GENDANG JENANG ILIA KA JAMBI

                                        SIRIH KALUKUP PINANGNYO MUMBANG

                                        IKO NIAN PAMAKAN KAMI

            SAULAK PULAK DARI PADO ITU, SIRIH SAKAPUA NYO LAH KAMI MAKAN PINANG SETEMISLAH KAMI KUNYAH. RUKOK SABATANG JUGO LAH KAMI ISAP.

            SARI LEMAKNYO LAH JATUH KA PERUT, AKAL TIBO PANANO JUGO LAH DATANG, KO ADO UJUT DENGAN NIAT ACAM DENGAN LEMAN. YANG NAK DISAMPAIKAN. KAMI PERSILAHKAN DENGAN HORMAT.

            NINEK MAMAK, TUO TANGANAI, CERDIK PANDAI ALIM ULAMA. PADO MALAM NAN ILUK KATIKO NAN BAIK BASAMO AYAM NAN BAINDUK, SERAI NAN SARUMPUN. BUKIT NAN TINGGI LAH MAMAK DAKI, LURAH NAN DALAM LAH NINEK TURUN, GUNO UNTUK DATANG KARUMAH BAPAK ......... SELEKUARGA.

            BAIKLAH NINEK MAMAK SUKU NAN SEBELAH. KOK DUDUK KITO LAH BAIPIT LUTUT, TEGAK KITO LAH BASENGGOL BAU. JADI YANG MANO PADO MALAM IKO. KAMI MENGUCAPKAN TRIMO KASIH ATAS KEDATANGAN NINEK MAMAK NAN SEBELAH. BAGI KAMI IDAK PULAK TAKEJUT DEK KILAT, DAK PULAK TAGAMANG DEK GURUH, ADAD PADANG KAPANASAN, ADAD BUMUN MENYELARO, UNTUK APO KAMI NAK BALINDUNG, ILUK LAH BATERUS TERANG. KALU TANG TANYO NINEK MAMAK, IOLAH ANAK BUAH PENAKAN KAMI YANG BANAMO, ........, KOK KECIK NYO LAH GEDANG, TENDAH NYO LAH TINGGI, LAUT NAN SALAMO KO. IBARAT BUNGO TU, LUM ADO LAH KUMBANG TU YANG DATANG JANGANKAN ITU, LALAT PIKAT PUN DAK PULAK ADO MAMAK NAMPAKNYO. MAMAK DAK DO DAHAN YANG BAKAL MANIMPO KUDUK, RANTING YANG BAKAL MEMETIK MATO, ITULAH DULU NINEK MAMAK.

            BAIK LAH NINEK MAMAK SUKU NAN SEBALAH NAMPAKNYO PADO MALAM KO, MAMAL NAN ILUK KATIKO NAN BAIK, YANG MANO KEDATANGAN NINEK MAMAK SUKU NAN SEBELAH IOLAH MELAMAR ANAK BUAH PANAKA KITO YANG SI BANAMO, ........ DIRUMAH IKO. JADI KINI KO MAMAK YOH SEBELUM KAMI MENERIMO LAMARAN DARI NINEK MAMAK NAN SEBELAH, YOH KAMI NAK BATANYO DULU PADO NINEK MAMAK NYO YANG LAIN. KALU ADO KESAD-KESAD BAK DAUN PIRING BULAK BALIK AIR JELUANG, KALU ADO YANG NAK DITANYO, KAMI PERSILAHKAN. KALU DAK DO MACAM MANO KITO MUATNYO. APO KITO TRIMO LAH, TRIMOLAHHHHHHHHHH.NAH ITU LAH BUNYINYO MAMAK, NAMPAKNYO LAMARAN MAMAK TU LA KAMI TRIMO DENGAN HATI YANG SUCI MUKO YANG JERNIH. DAK DO LAH DAHAN YANG BAKAL MENIMPO KUDUK RANTING YANG BAKAL MEMETIK MATO.

            BAIKLAH NINEK MAMAK SUKU NAN SEBELAH NAMPAKNYO RUNDING KITO PADO MALAM KO. IBARAT JALO TU LAH KATAP KABUNGIN, JADI KINI TO BAK KATO ADAD. KAWIN TU BARADAD, SARAKNYO BAHUKUM. NYAH JADILAH YANG MANO SESUAI PANTUN SLOKOHNYO

                                        BAJU ITAM BAKACING TUJUH

                                        PAKAIN ANAK RAJO SEBERANG

                                        KALU MAMAK TU BAKATO SUNGGUH

                                        APO TANDO NAK KAMI PEGANG

 

PAU-PAU/SANGSI HUKUM

ASSALAMU’ALAIKUM. WR.WB

BAIKLAH SEGALO KITO YANG HADIR. LAH SAMO-SAMO KITO SIMAK KITO DENGA. APO YANG DISAMPAIKAN DARI PADO NINEK MAMAK YANG KEDUO BELAH PIHAK NAMPAKNYO KO, BAIK YANG MELAMAR ATAU YANG MENERIMO LAMARAN. NAMPAKNYO SESUAI KATO ADAD DAKDO KITO BATEMU TANAH YANG BATUKAH, BATEMULAH TANAH YANG BAPAKUA. DAK BATEMU KETEMU KITO YANG BATUKAH BATEMULAH KITO YANG SALUKUA. JADI BAIKLAH NINEK MAMAK SUKU YANG DATANG KO. SEBELUMNYO KAMI MOHON MA’AF, MUNGKIN ADO KATO AGAK BEDA. JADI SESUAI BAK KATO ADAD TU. DIMANO TAMILANG DI CACAK DISITU TANAMAN TUMBUH, DIMANO BUMI DIPIJAK DISITU LANGIT DIJUNJUNG. JADI  BAIKLAH PADO MALAM KITO BUAT SANGSI HUKUMNYO, ANAK BUAH PENAKAN KITO, YANG MANO DALAM PERJALANAN MASIH ADO TENGGANG WAKTUNYO. DALAM HAL IKO ADO DUO HAL, PERTAMO KENO OLAH, YANG KEDUO NYO KENO ALLAH, KALU KENO OLAH KO KOK UBAHNYO DARI YANG BATINO, YO SO BALIK DUO, TAMBAH LAGI DENDONYO KAMBING SIKUK BERAS DUO PULUH, KELAPO DUO PULUH, SERTO SELEMAK SEMANIS, KOK UBAH DARI YANG JANTAN, YANG DIANTAT PADO MALAM KO DIDENDO JUGO KAMBING SIKUK BERAS DUO PULUH KEPALO DUO PULUH SERTO SELEMAK SEMANISNYO. JADI KAMI MINTAK KEPADO NINEK MAMAK DUO BELAH PIHAK UNTUK SAMO-SAMO MENJAGO ANAK BUAH PENAKANNYO, SEBAB IBARAT JALAN TU LAH BAROBAH, KOK PINANGNYO LAH BAREBAT, SAMO-SAMO LAH KITO MENJAGONYO MENJELANG HARI YANG KITO JANJI KO TIBO.

HANYO ITU YANG DAPAT KAMI SAMPAIKAN LEBIH KURANGYO KAMI MOHON MA’AF. KAMI AKHIRI. ASSALAMU’ALAIKUM. WR.WB

I.     NYERAH LEK

ASSALAMU’ALAIKUM. WR.WB

MANO LAH SEGALO KITO YANG HADIR, YANG ADO DALAM UMAH NAN BATUAH KO, UMAHNYO YANG BA ATAP BUBUNG PERAK TIANG NAN BA ALEH SENDI GADING, UMAH NAN BAPAGA ADAD, HALAMAN NAN BASAPU UNDANG, TAPIAN NAN BA PAGA BASO.

MANO LAH SAGALO NINEK MAMAK, TUO TANGANAI YANG TINGGI TAMPAK JAUH, YANG DEKAT JULUNG BASUO, BATANG TINGGI PUCUK MANYULAI, YANG MENYANDANG JALO NAN BAKANDUL, NAN MANYINJING TALITI, NAN BAKATO DULU SAPATAH, NAN BAJALAN DULU SELANGKAH, KATO PEPATAH MENYUDAHI PEGI TEPAT BATANYO BALIK DAPAT BABARITO JADI TUAH ANAK PEMENAKAN.

MANO SAGALO TUAN GURU ALIM ULAMA, YANG BANAMO SULUH GEDANG DALAM NEGRI, URANG ALIM DENGAN KITABNYO, SARI’AT AGAMO YANG DIBAWO KATO KHOLIPAH YANG DI JUNJUNG SYARAK MENGATO ADAD MEMAKAI.

MANOLAH SAGALO KITO YANG HADIR, SALARIK BENDUL DI TENGAH, SALINGKUNG BENDUL DI TEPI, KOK DUDUK KITO LAH BAIPIT LUTUT, TEGAK KITO LAH BASENGOL BAU, YANG KECIK IDAK DISEBUT NAMO YANG GENGAN JUGO IDAK KAMI IMBAU GELANYO.

BAIKLAH PADO MALAM KO, KOK BAKATO NUPANG DULU SEPATAH, BAJALAN NUPANG DULU SALANGKAH, BAIKLAH KAMI DARI UMA NAN BATANGANAI BASERTO MAMAKNYO, KAMI NAK BASALABA PADO SEKALIAN KITO YANG HADIR KO. YANG MANO BEBERAPO HARI SUDAH MINGGU YANG LALU BULAN YANG LEWAT, IOLAH ANAK BUAH PENAKAN KAMI LAH BARUSIK SIRIH BAGURAI PINANG ANAK SI .......... YANG BANAMO........... , LA ABIS ARI BAGANTI MINGGU LAH ABIS MINGGU BABILANG BULAN KO SAUT TU NAK KAMI LANGSUNG SANGI JUGO NAK KAMI SAMPAI JADI RINGKAS KATO, KAMI SELAKU MAMAKNYO. DATANG MEMALAR, ALHAMDULILLAH LAMARAN KAMI TU DITERIMO OLEH SUKU NAN SEBELAH TU.

JADI ANTARO SUKU NAN DUO BELAH PIHAK KO LA BAIKEK BOTAN BA JANJI BASAMAYO, IOLAH MENCARI ARI NAN ILUK, KATIKO NYO NAN BAIK, NAMPAKNYO ARI NAN ILUK LA DATANG, KETIKO NAN BAIK JUGO LAH TIBO,   ITULAH MAKONYO, KAMI SENGAJO MEMANGGIL SEKALIAN KITO YANG HADIR KO. KOK SUKU JAUH MAUPUN SUKU DEKAT, SUKU JAUH LAH KAMI LAYANG DENGAN SURAT, SUKU DEKAT JUGO LAH KAMI LANTING DENGAN KATO.  KOK SUKU JAUH LAH DATANG,  SUKU DEKAT LAH TIBO, BA SERTO ORANG SEMENDO.  JALUNG DITEPI PAYO ADO SORANG ADOLAH GALO. JADI PADA HARI NAN SEMALAM KO SENGAJO SI  BEDUL,    MENGUNDANG SEKALIAN KITO YANG HADIR KO, YANG MANO SI BEDUL KO NAK NGELEK ANAKNYO YANG BENAMO SI DORI. JADI LEKNYO JATUH PADO HARI RABU, MALAM RABU AKAD NIKAHNYO. JADI SAMO-SAMO LAH KITO MENGANTA NYO KE RUMAH CALON PENGANTEN YANG BATINO.

TIAP-TIAP BAREK TU BERAT GAWE NYO, KOK BIDUK GEDANG DAK TEKAYUH SORANG. RAKIT PANJANG TU DAK TAPALING DEWEK. REBAHNYO MINTA TULUNG, TUKEK PATAINYO MINTA TULUNG JUANG, SESUAI KATO ADATNYO KECIK LIMBEK GEDANG LIMBEK, NAMUN SUNGUT TETAP LAPAN. KECIK LEK GEDANG LEK BARAH MENTAH MINTAK DIMASAK, LAH MASAK MINTA DIBAGI TAMU MAKAN.  JUGO KITO YANG HADIR KO.

TIAP BERALEK TU NAK BEKAMPUNG, BEKAMPUNG KAMI KO DUO, DAK TIGO, BEKAMPUNG KAMI KO SEKALI LAH. LEK KO NGELIH TUMBUH TUMBUHNYO. KOK TUMBUHNYO DI ATEH BATU LULUHNYO KE BAWAH BATU, TUMBUHNYO DI ATEH BATANG LULUHNYO DI BAWAH BATANG.  NAH NAMPAKNYO LEK KO TUMBUHNYO DI RT 02, MAKO DARI PADA ITU, KAMI DARI UMAH NAN BETANGGGANAI PADA MALAM IKO MENYERAH LEK PADA KAMPUNG NAN BATUO ADAD DENGAN SYARAK NYO ATAS RT. KENAPO KAMI SERAH PADA KAMPUNG NAN BATUO ADAD DENGAN SYARAKNYO, KARENA ITULAH URANG NAN BAIKUK RIMBUN BAKEPAK REBAH, MAKA NYABIS NYENJANG MUTUS. ULAK-ULAK DARI PADA ITU, YANG MANO KATO LEK YANG BAPAKAL KERJO YANG BAJUJUNG, PAKAL LEK IOLAH URANG BANYAK. JUJUNG LEK ADAD DENGAN SYARAK NYO ATAS NYO RT. GAWE NINEK MAMK TU APO, MALEIK MALENGONG, KALU ADO BULEK DATANG BAGULING, PEPEH DATANG MELAYANG. ITU GAWE NINEK MAMAK  BABETENG DADO BAKUTO BETIS. HANYO ITULAH YANG DAPAT KAMI SAMPAIKAN. DAN SAYA AKHIRI.....ASSALAMU’ALAIKUM. WR.WB...

JEMPUT PENGANTEN

ASSALAMU’ALAIKUM. WR.WB...

NINEK MAMAK, TUO TANGGANAI, ALIM ULAMA, CERDIK PANDAI, KAMPUNG NAN BATUO, UMAH NAN BATANGGANAI, SERTO ADAD DENGAN SYARAK.

SELARIK BENDUL DI TENGAH SALIKUNG BENDUL DI TEPI, KOK DUDUK LAH BA IPIT LUTUT, KOK TEGAK KITO LAH BASENGGOL BAU, KECIK IDAK KAMI SEBUT NAMO, GEDANG IDAK PULO KAMI IMBAU GELAH.

BAIKLAH NINEK MAMAK DAN SEGALO KITO YANG HADIR. BAK PANTUN SALUKO NYO:

GEMUTUP BUNYI NYO GENDANG

GENDANG RAJO ILIA KA JAMBI

SIRIH KA LUKUP PINANG NYO MUMBANG

IKO YANG ADO DARI KAMI

PALIMAN NAN SEBUAH MINTA DI BUKA, SIRIH SAKAPUA MINTA DI MAKAN, PINANG NAN SATEMIS MINTA DI KUNYAH, ROKOK SABATANG MINTA DI ISAP. ITULAH DULU NINEK MAMAK NAN SEBELAH.

BAIK LAH, YANG MANO KAMI URANG BATIGO KO DISURUH, DISERAYO OLEH SUKU NAN DUO KO. SUKU SI (A) DAN SUKU SI (B) BESERTO UMAH BATAGANAI, KAMPUNG NAN BATUO SERTO ADAT DENGAN SYARAKNYO. MENEPAT SUKU NAN DUO DISIKO IOLAH SUKU (C) DAN SUKU SI (D) BESERTO UMAH NAN BATAGANAI, KAMPUNG NAN BATUO BESERTO ADAT DENGAN SYARAK NYO. YANG MANO KAMI URANG BATIGO KO, BAK KUDO PELAJANG BUKIT, PARAHU PLAYANGAN, DISURUH PEGI DI IMBAU DATANG, YANG MANO KAMI KO DISURUH MENYEPUT CALON PENGANTEN YANG BANAMO BAKRI, KARNO ACARA PADO MALAM KO AKAD NIKAH, NYO BASERTO LAH KAMI MENGAJAK SEGALO KITO YANG HADIR KO UNTUK MERAPAK MERIMBUN NYO DAN DAK LUPO KAMI NGAJAK URANG TUONYO. ITU LAH YANG DAPAT KAMI SAMPAIKAN. KAMI SUDAHI.

ASSALAMU’ALAIKUM. WR.WB

I.     PENGANTAR

NENEK MAMAK TUO TANGANAI, ALIM ULAMA CERDIK PANDAI KAMPUNG NAN BATUO, UMAH NAN BATAGANAI SERTO ADAT DENGAN SYARAKNYO, SALARIK BENUL DITENGAH SALIKUNG BENUL DITEPI, KOK DUDUK KITO LAH BAIMPIT LUTUT TEGAK JUGO LAH BASENGGOL BAU, YANG KECIK IDAK DISEBUT NAMONYO, YANG GEDANG IDAK JUGO DI IMAU GELA NYO.

BAIK LAH NINI MAMAK SUKU NAN SEBELAH KAMPUNG NAN SABAGIH DAN SEGALO KITO YANG HADIR, PERTAMO-TAMO KAMI MOHON MAAF, AKMI SUSUN JARI NAN SAPULUH, KAMI HUJAM LUTUT NAN DUO KAMI TEKUK KEPALO NAN SATU, YANG MANO KAMI KO, KOK IBARAT BAJALAN TU NAK DULU SAPATAH KOK BAKATO TU NAK DULU SAPATAH, SESUAI DENGAN SALAKO ADAGTNYO.

       SAIRING LAH BALAM DENGAN BAREBAH

       BAREBAH LALU BALAM KEMBALI

       SEIRING SALAM DENGAN SEMBAH

       SEMBAH LALU SALAM PUN KEMBALI

BAIKLAH NINIK  MAMAK SUKU NAN SEBELAH KAMPUNG NAN SABGIH, ATAS KEDATANGAN KAMI KO JANGAN PULAK NINIK MAMAK TU TEKEJUT BADITIPO TANGGO, TAGAMANG BAK BAK DITIPO UPIH, SEBAB KAMI ROMBONGAN YANG DATANG KO, IDAK ADO PULAK MEMBAU MEH NAN KUNING, TAPI HANYO BASANGU PALIMAN NAN SEBUAH YANG BARISI SIRIH NAN SACABIK PINANG NAN SETEPIS, SESUAI BAK KATO PANTUN SALOKONYO.

URANG DUSUN BATANAM SIRIH

TUMUH SABATANG DALAM JERAMI

SIRIH NAN BASUSUN PINANG NAN BATEPIS

IKO LAH YANG ADO PADO KAMI

SIRIH KUNING DALAM NAPAN, SESEP MENJADI SEMAK, SEMAK JADI RIMO GANO, SIRIH KAMI MINTAK DIMAKAN, AWAL SEMBAH PAMULO KATO.

II.      TARAMO KASIH NINEK MAMAK SUKU NAN SABELAH SIRIH SAKAPUA LAH DIMAKAN, PINANG SATEPIS LAH DIKUNYAH, ROKOK SEBATANG LAH DI ISAP, KOK SIRIH NYO LAH PECAH BULUH. ROKOK NYO JUGO LAH RIMBUN ASAP. TABIK SAPULUH KALI TABIK, MAAF SAPULUH KALI MAAF ADOPUN MAKSUD KEDATANGAN KAMI KO SESUAI BAK KATO PANTUN SALOKO ADAT NYO.

                            PEGI BARUTAN KE BATANG ASAI

                            AMBIK JUGO LAH ROTAN SEGO

                            IKEK BOTAN NYO YANG LAH SAMPAI

                            JANJI SAMNYO YANG LAH TIBO

JALAN MANARAT KA BATANG ASAI

SINGGAH TAMALAM DI MUARA SAKAI

ADAT SARAHNYO YANG LAH SELESAI

TINGGAL LAGI PEGANG PAKAI

YANG MANO DIKATO-KATOKAN PEGANG PAKAI ADAT KITO KO, APOBILO ANAK BUAH PENAKAN YANG LAH NIKAH, KALU BULOM DIULUA ATA JAWAT TARIMO LUM DAPAT DIKATO KAN URANG SEMENDO BARU BULIH DIKATOKAN ANAK MENANTU, SIANU ….. DIRUMAH KO TAPI KALU LAH DIULUA OLEH NINIK MAMAK SUKU NAN DUO BELAH PIHAK BARU LAH DAPAT DIKATOKAN URANG SEMENDO.

JADI DEK ANAK BARAJO KE BAPAK, KEMENAKAN NAN BARAJO KE MAMAK, TENTU GAWE IKO UTANG MAMAK KEPDO KEMENAKAN. JADI PADO HARI NAN SARI KO, IOLAH NAK NYELESAI UTANG MAMAK KEPADO KEMENAKAN. KOK NYO BARUTANG NAK KAMI ANTA KA LIDAH NARACO,  KOK NYO MATI NAK DI ANTA KA TANAH PALAYU, NAN KINI KO TANG BATUNAK BATANI, YANG NAK KAMI ANTA KA BAKEH SUKU NAN SEMENDO NYO DI SIKO, JADI KAMI DARI SUKU NAN DUO, SUKU SI ANU BADUO LAKI BINI BASERTO UMAH NAN BATAGANAI KAMPUNG NAN BATUO SETO ADAT DENGAN SYARAK NYO. MANGULUA MANGATA ANAK BUAH PENAKAN KAMI YANG BANAMO SI PULAN. YANG PETAMO KE SUKU NYO, KADUO KA UMAH BATAGANAI, KATIGO KA KAMPUNG NAN BATUO ITU LAH DULU NINEK MAMAK SUKU NAN SEBELAH.

III. KALU ITU YANG NINI MAMAK TANYO KAN IDAK PULO LUPO KAMI KAMI DEK KARNO LAMO, RAGU DEK KARNO BANYAK, YANG KAMIA KAMI ANTA PADO ARI NAN SARIKO DAK LAIN DAK BUKAN  BADAN TUBUH, TULANG BALULANG BASERTO GAWE GANTI NYO, SELAIN DARI PADO ITU, IDAK PULO ADO NAMPAK NYO BAIK NAN TATINTING DEK TANGAN, MAUPUN YANG TANJUNJUNG DEK KAPALO, SA ULAK DARI PADO ITU ULUA ANTA KAMI KO, IDAK PULO BASERAK PAKAPILAN. BAPESAN BATURUTI, KOK BA AMBUA IDAK PULO BAPEGANG TALI BA OJO IDAK PULO BAPEGANG IKUK. BAIKLAH NENEK MAMAK SUKU NAN SEBELAH SEPENINGGAL KAMI KO KELAK TULUNG TUNJUK LAMAN TEMPAT NYO BAMAIN, TAPIAN TEMPAT NYO MANDI, SUPAYO ANAK BUAH KEMANAKAN KAMI KO, KOK IDUP NYO NAK DI KANDUNG ADAT, MATINYO NAK DI KANDANG SYARAK, ITULAH DULU NINIK MAMAK SUKU NAN SEBELAH.

IV. BAIKLAH KALU YANG ITU NINIK MAMAK SEBALAH TANYOKAN BAGI KAMI SUKU NAN SEBELAH KO, IDAK PULA SEGAN TAGAMANG TAKUT JATUH, BASANGILAK SEGAN TAKENO, IDAK PULO BACARI TAGAKICIK JALAN TELEPEH, TEGEMBO S.KALU LAH BAITU NIAN TIBONYO ISUK BAGI KAMI TU, BILO MAMAK TU BA IMBAU, BILO ITU KAMI MENYAHUT ASAL NINIK MAMAK BAKABA DAN NGAJAK KAMI INSA ALLAH KAMI DATANG.

BILO NAN KINI KO, BILO SEMAK BILO ITU KITO SIANG BILA BATUNAS BILO ITU KITO SISIK.

SELESAI

I.     PENERIMO ULUA ANTA

ASSALAMUALAIKUM WR.WB

 BAIKLAH NENEK MAMAK, TUO TANGANAI, CERDIK PANDAI ALIM ULAMA, KAMPUNG NAN BATUO UMAH NAN BA TANGANAI SERTO ADAT DENGAN SYARAK NYO.

SALARIK BENDUL DI TENGAH SALIKUNG BENDUL DI TEPI, KOK DUDUK KITOLAH BA IPIT KOK TEGAK KITO LAH BASENGGOL BAHU, YANG KECIK IDAK KAMI SEBUT NAMO, YANG GEDANG IDAK KAMI PULO KAMI IMBAU GELANYO.

BAIKLAH NENEK MAMAK SUKU NAN SEBELAH ATAS KEDATANGAN NYO KAMI UCAPKAN TARIMO KASIH BAGI KAMI, IDAK PULO TEKEJUT DEK GURUH, TAGAMANG DEK KILAT, ATAS KEDATANGAN NENEK MAMAK SUKU NAN SEBELAH, SEBAB APO KOK BA MIMPI DAPAT PADILAH KAMI SADIO RANGKIAN NYO, KOK BA MIMPI DAPAT MEH TU LAH KAMI SADIO PURO NYO.

LAUT NAN SLAMO KO LAH PUTIH MATO DEK MEMANDANG LAH RUNTUH TEBING DEK MENINJAU. DEK NUNGGU SANAK JAUH NAN BAKAL DATANG PEMEMAN DEKAT BAKAL TIBO. NAH NAMPAK NYO YANG KITO TUNGGU LAH DAYANG YANG DI TANTIK JUGO LAH TIBO. JADI NAN SABIK NYO NINEK MAMAK SUKU NAN DATANG KAMI TANTIK DENGAN NASI PUTIH GULAI NAN KUNING, SEBAB APO KO BUKIT NAN TINGGI LAH DI DAKI LURAH NAN DALAM DITURUN LAH JAUH JALAN YANG DITEMPUH, LAH PANJANG RUNUT TABENTANG YANG DITURUTI, TAPI DEK KIAN LAH NAK NGATO NYO MAMAK IBARAT NYO KAMI KO IDUP DALAM BASAKIT GEDANG DALAM SESO, BAIK KATO SLOKO MUDONYO MISKIN NAN SABALIK ILANG BASAD NAN SABALIK MATI, TANDO ADO BAE BADAN TA DIRI, TANDO IDUP NYOWO BEKURANG, TAPI DEK KITO KO LAGI SE IBAK BAK NASI LAFI SEPUCUNG BAK GULAI, ALGI SA INDUK MAK AYAM LAGI SERUMPUN BAK SERAI BANYAK TUNAS, BAK LAH SESUAI BAK PANTUN SELOHNYO (GEMUTUP BUNYINYO GENDANG, GENDANG JENAG ILI KA JAMBI, SERIH KELUKUP PINANGNYO MUMBANG IKO NEAN PEMAKAN KAMI, NAK DUO PANTUN SA SEMAK MENAJDI RIMBO PULO, SIRIH MAMAK LAH KAMI MAKAN AWAL SEMBAH PERMULA KATO, KOK ADO UJUD YANG NAK DI SAMPAI YO KAMI PERSILAHKAN DENGAN SEGALA HORMAT.

II.   PENERIMO ULUA ANTALAH IO TU MAMAK YANG DI IANA TU KUKU, KUKU LAH ABANG YANG DI INTAI KATO ITU, LAH DATANG, LAH RASO TAMINUM DI AEK RIMBO, RASO TAMAKN DI TEBU TALANG, RETI  NYO KAMI  TU LAH DAPAT CINTO YANG LEBIH DI SAKTI, TUAH KERIS KEBAYANGAN ILANG DI DAYA TIMBUL DI DARAT, KECIK TAPAK TAGAN KAMI TADAH DENGAN NERU, PENDEK JARI TANGAN KAMI SAMBUNG DENGAN PENYULUK BAK PANTUN SLOKOH NYO.

SABUBUT DI PADANG LEPANG

ILIA BAREMBUN DI PAGI ARI

ITAM YANG KAMI TUNTUT, PUTIH YANG DATANG

IKO NIAN YANG KAMI CARI

DALAM HAL KO DEK KAMI TU IDAK PULO TAKEJUT BAK DI TIMPO TANGGO, TAGAMANG BAK DI TIMPO UPIH. TAPI BAIK TIBO TU NAK DI SAMBUT, DURIAN JATUH TU NAK DISINA MAKLUM LAH KURANG SIANG BATANAM PADI BANYAK RUMPUT KURANG SISIK BATANAM BULUH TUNAS MANYADI, KOK TEGAK KAMI NAK NUMPANG BATANYO KOK DUDUK KAMI NAK NUMPANG BATUIK. YANG MNO TANYO KAMI TU APO NIAN YANG DI ULUA DI ANTA NENEK MAMAK SUKU NAN SEBELAH TU SALAIAN DARI PADO NAMO NYO, ITU LAH DULU MAMAK NAN SEBELAH.

III.  PENARIMO ULUA ANTA

BAIK LAH KALU ITU KATO NINEK MAMAK SUKU NAN SEBELAH YO LAH BALIK DARAH KAMUKO, LAH PULANG IMAN KA DADO KO KA PUCUK LAH TAU PANGANTUNG NYO, KOK KABAWAH LAH TAU PULAK PALETAKNYO, LAH SENANG PULAK RASONYO DI HATI KAMI KO ADO SALIBIH DARI ITU, IDAK PULO ADO TANAH KATO URANG TEMPAT NYO TUMBUH REBUNG TEMPAT NYO GEDANG.

KOK BADAN TUMBUH , TULANG BALULANG, SERTO GAWE GATI NYO, YO NAK KAMI IARAK, NAK KAMI, NAK KAMI ASUNG, KAMI SURUH KAMI SARAYO. KAMI AJUM, NAK KAMI ARAH. BAIK LAH NENEK MAMAK SUKU NAN SEBELAH SEBELUM KAMI MOHON MAAF DULU, KARNO ULA ANTA LUM DAPAT AKU NAK NERIMO NYO KARNO PADO ARI KO MASIH ADO LAGI MAMAK NYO YANG LAIN, NAH KINI KO CAM MANO KITO MUAT ULA ANTA KANTI KO, APO KITO TERIMO LAH APO BELUM ( TRIMO LAH KATO MAMAK YANG LAIN).

NAH ITU LAH BUNYI NYO MAMAK ULA ANTA MAMAK TU LAH KAMI TARIMO DENGAN HATI YANG SUCI MUKO YANG JERNIH SAULAK PULO DARI PADO ITU, KOK DUDUK KAMI NAK BAKISA, KOK TEGAK KAMI NAK BARALIH, YANG MANO KAMI NAK MENYAMPAIKAN SEPATAH DUO PATAH KATO KEPADO URANG SEMENDO YANG BARU KAMI TARIMO KO, SILAHKAN KEPADO MAMANDA BEDUL.

BAIKLAH NENEK MAMAK SUKU NAN SEBELAH PADO ARI NAN SARIKO KO DUDUK KITO LAH BAI IMPIT LUTUT, TEGAK KITO LAH BESENGGOL BAU, KITO NAK BA IKEK BOTAN BAJANJI BASAMO, DULU KATO BACARI, KANDIAN KATO BA DEPAT, DI MUN DI ELUK PADO RUPO PANDANG PADO ROMAN. ANAK BUAH PENAKAN YANG BARU KAMI TRIMO KO AIK NENG IKAN NYO JINAK RUMPUT PANJANG KERBAU NYO GEPUK, BUMI AMAN RANTAU SELESAI, NAH MALANG TIBO DI KAMI MAMAK KUNYIT DI TANAM PUTIH ISI, ULAK ULAK SUNGAI ULAK, ULAK BA MUARO SUNGAI TABIA, TA MAKAN NYO DI GULO BULIH DEMAM, TAISAP DITAMAKO BULIH MABUK, KOK DEMAM MASIH TELOK DEK SEPIRING URAS, MABUK MASIH TELOK DEK SEMANGKUK UMAU, KAMI LUM PULAK NGAJAK MAMAK UNTUK GUBATNYO, TAPI TALABUH NYO KO ISUK, CACANG TANDUK  MANJORONG, GEDANG KELASO IDAK TAKIPA, KENCANG KELAWAN IDAK TA KENDUA GELI PIPI IDAK TAKUSUK LADI, NAH MAK MANO KITO MUAT NYO, ITU LAH DULU NINEK MAMAK.

IV.  PENERIMO ULUA ANTA

TARI MO KASIH NENEK MAMAK NAN SEBELAH, KALU BA ITU KO NAMPAKNYO, LAH SADEKAK BAK BATU, LAH SEDECING BAK BISI LAH SA ILUN TEPUK DENGAN PENGEH, LAH SA IDA RIAK DENGAN GELOMBANG, NAH SESUAI DENGAN PANTUN SLOKOHNYO.

AKA BABULUH PANYALIN LUKAH

LUKAH DIPASANG BAWAH RAKIT

KATO DA HULU JANGAN DIUBAH

KALU DIUBAH JADI PENYAKIT

NAH HANYO ITU LAH YANG DAPAT KAMI SAMPAIKAN SEBELUM KAMI TUTUP, ADO SEDIKIT PANTUN,

RUNDING SUDAH GAWE SELESAI, KAJI TAMAT SURAT

DILINGKUP, TANDO WALI DENGAN SANAK

TANDO ISLAM PUTIH HATI

MARI BASALAM BAJABAT TANGAN LAH KITO

KAMI AKHIRI ASSALAMUALAIKUM WR.WB.

KATO NASEHAT

BAIK LAH ANAK SI PULAN, KINI KAWAN LAH JADI URANG SEMENDO DI RUMAH IKO, PERLU KAWAN KETAHUI MENURUT ADAD, ANAK SAKATO BAPAK, KEMENAKAN SAKATO MAMAK BINI SAKATO LAKI, UMA SAKATO TANGANAI. YANG MANO BAK KATO ADAD, SEKECIK-KECIK SEMATUNG DI RIMBO KALU LAH BA BUAH TU TANDO NYO LAH TUO. BAITULAH KITO KALU LAH BATUNAK BATANI SUDAH DINAMOKAN PESAKEN, IDAK LAGI DI KATO KAN BUJANG, KINI KITO IDAK BUJANG LAGI NAMONYO KINI TU ANJAK LAKU UBAH PAKUO, ASAK BASO UBAH TUTUA, KELAKU AWAK BUJANG DULU YO TINGGAL LAH DI BUJANG KALU KITO LAH SEMENDO KO, MAK DI TINGGAL MAK DI DEPAT BAPAK DI TINGGAL, BAPAK BAPAK PULO YANG DI DEPAT, KAMPUNG DI TINGGAL KAMPUNG JUGO DIDEPAT, UMAH DI TINGGAL, UMAH DI DEPAT, UMAH TEMPAT KAWAN TINGGAL IKO LAH RUPONYO BAK KATO SLOKONYO, SILIH BATEDUH DI BAWAH AWUA, SILIH BAJUTAI DI ATEH BATANG, KOK ADO ATAP NAN MIRIS, TULUNG DISISIP, KOK ADO LANTAI YANG RUSAK TULUNG DI BIKIN, YANG MANO KATO SLOKO NYO.

BIDUK MEDANG PENGAYUH MEDANG

TERUNG KA DERO DALAM PADI

AWAK GEDANG SAMO GEDANG

SAMO DI KIRO DALAM HATI

BAIKLAH KAWAN SI PULAN KOK RANTAU JAUH MINTA DI ULANG RANTAU DEKAT MINTA DI KEDANO NAK TAU DI ERENG DENGAN GENDENG, NAK TAU DI BASO DENGAN BASI, KALU BINI BABASO KA SANAK TUO NYO ABANG, YO AWAK JUGO GIMBAU NYO ABANG MACAM ITU PULO LAH SI BINI KO NAH SAULAK PULO DARI PADO ITU, YANG DAK BULIH DI BUAT SELAKU AWAK URANG SEMENDO KO KECAK BETIS BAK BETIS, KECAK LENGAN BAK LENGAN, BARAJO DIHATI BASUTAN DI MATO POKOKNYO NAK SAKATO AWAK LAH, NAH KENDAK KAMI TU NAK LAH JADI SEMENDO NINEK MAMAK, NAH AKMI RASO HANYO ITU YANG DAPAT KAMI SAMPAIKAN JUGO KAMI PESAN DALAM PANTUN NASEHAT.

HARI PETANG MASIH MENYAPU       

URANG BANYAK MANDI KAPULAU

LAH PANJANG JANGUT DI DAGU       

BELUM JUGO NAK KESURAU              

                                                                      

NAK DUO PANTUN SAIRING

TEMERAU DI RUPAK PATIN

SELASIH DIREBAH BUDAK

BIA BABADERAU AYAT TALKIN

NAMUN KASIH BARUBAH IDAK

ASSALAMUALAIKUM WR.WB